තද වැසි සහ හිම කුණාටුවක් හේතුවෙන් ඉන්දියාවේ නවදිල්ලි නුවර ඉන්දිරා ගාන්ධි ජාත්‍යන්තර ගුවන් තොටුපළේ ගුවන් ගමන් රැසක් අඩාල වී තිබෙනවා. හිම කුණාටුව නවදිල්ලි අගනුවරට මෙන්ම යාබද නගර රැසකට ද බලපා ඇති බවයි ඉන්දීය මාධ්‍ය සඳහන් කළේ.
ඊයේ පස්වරු 6 සිට 8.45 දක්වා කාලය තුළ ගුවන් ගමන් 38ක්, වෙනත් ගුවන් තොටුපළ වෙත යොමු කර තිබෙනවා.
ඒ අනුව දිල්ලිය වෙත පැමිණි ගුවන් යානා ජායිපූර්, ලක්නව්, අමිර්ත්සාර්, වාරනාසි සහ ඉන්දෝර් ගුවන් තොටුපළ වෙත හරවා යැවූ බවයි දිල්ලි ගුවන් තොටුපළ බලධාරීන් ප්‍රකාශ කළේ.
මේ අතර, කාශ්මීර කලාපයට ද දැඩි හිමපතනයක් ඇති වී තිබෙන අතර, ශ්‍රී නගර් ගුවන් තොටුපළේ සියළු ගුවන් ගමන් තාවකාලිකව අත්හිටුවා තිබෙනවා.
ජම්මු කාශ්මීරයේ හිමපතනයට ගොදුරු වූ ඉන්දීය පොලිස් භටයන් 6 දෙනෙකු, ගිනි නිවන භටයන් දෙදෙනෙකු සහ සාමාන්‍ය වැසියන් දෙදෙනෙකු අතුරුදන් වී ඇති බව සඳහන්.
