අතුරුදන් වුවන් පිළිබඳ කාර්යාලය සඳහා ව්‍යවස්ථාදායක මණ්ඩලය මඟින් නිර්දේශ කළ කොමසාරිස්වරුන්ගේ නම් ලැයිස්තුවට ජනාධිපතිවරයාගේ අනුමැතිය හිමිවී ඇති බව කථානායක කරූ ජයසූරිය පවසනවා.
හිරු ප්‍රවෘත්ති අංශය කළ විමසීමකදී කථානායකවරයා කියා සිටියේ ඒ සම්බන්ධයෙන් ව්‍යවස්ථාදායක මණ්ඩලය දැනුම්වත් කර ඇති බවයි.
අතුරුදන් වූවන් පිළිබඳ කාර්යාලයක් පිහිටුවීම සඳහා වූ කෙටුම්පත පාර්ලිමේන්තුවේදී සම්මත වූයේ මීට වසරකට පමණ පෙරයි.
එහෙත් ඒ සඳහා කොමසාරිස්වරුන් නම් කිරීම පිළිබඳ ඒකමතික භාවයක් නොමැතිවීම නිසා එය ක්‍රියාත්මක කිරීම මෙතෙක් පමා වුණා.
ව්‍යවස්ථාදායක මණ්ඩලය මගින් අයදුම්පත් කැඳවීමෙන් පසු නිර්දේශිත නම් 08 ක් ජනාධිපතිවරයා වෙත යවා තිබෙනවා.
දැන් ඒ සඳහා අනුමැතිය හිමිවී ඇති බැවින් අතුරුදන් වූවන් පිළිබඳ කාර්යාලය ක්‍රියාත්මක කිරීමට හැකිවනු ඇති.
එක්සත් ජාතීන්ගේ මානව හිමිකම් මණ්ඩල සැසිවාරය ලබන සතියේ ආරම්භ වන අතර, ඒ සඳහා අතුරුදන්වූවන් පිළිබඳ කාර්යාලය පිහිටුවීමේ ප්‍රගතිය වාර්තා කිරීමට රජය අපේක්ෂා කරන බව සඳහන්.
