දෙමටගොඩ පිහිටි ඛනිජ තෙල් සංස්ථා පරිශ්‍රය තුළ සිදුවූ වෙඩි තැබීමකින් එහි සේවකයින් දෙදෙනෙකු තුවාල ලබා කොළඹ ජාතික රෝහලට ඇතුළත් කර තිබෙනවා.
මොවුන් දෙදෙනාගේ තත්ත්වය බරපතල බවයි රෝහල් ප්‍රකාශකයෙකු සඳහන් කළේ.
හිටපු ඛනිජ තෙල් අමාත්‍ය අර්ජුණ රණතුංග එම පරිශ්‍රයට අද (28) පස්වරුවේ පැමිණි අවස්ථාවේදී එහි නොසන්සුන්කාරී තත්ත්වයක් ඇතිව තිබෙනවා.
එම අවස්ථාවේදී හිටපු අමාත්‍යවරයාගේ ආරක්ෂක නිලධාරියෙකු සිදුකළ වෙඩි තැබීමකින් එහි සේවකයින් දෙදෙනෙකු තුවාල ලැබූ අතර මොවුන්ගේ හිසට සහ උදරයට තුවාල සිදුවී ඇති බවයි රෝහල් ප්‍රකාශකයා සඳහන් කළේ.
වෙඩි තැබීම සිදුකළ ආරක්ෂක නිලධාරියා මේ වන විට අත්අඩංගුවට ගෙන ඇති බව පොලිස් මාධ්‍ය ප්‍රකාශක, පොලිස් අධිකාරී රුවන් ගුණසේකර සඳහන් කළේ.
