චීනයට පිරිනමා තිබූ ඇමරිකානු ඩොලර් මිලියන 300 ක් වටිනා නිවාස සංවර්ධන ව්‍යාපෘතියක් ඉන්දියාවට ලබාදීම පිලිබඳව චීන රජය ප්‍රතිචාර දක්වා තිබෙනවා.
එහිදී චීන විදේශ කටයුතු අමාත්‍යාංශය චීන – ශ්‍රී ලංකා සබඳතා සම්බන්ධයෙන් ද පැහැදිලි කිරීමක් කළා.
චීන විදේශ කටයුතු අමාත්‍යාංශයේ ප්‍රකාශක ලූ කෑන් කියා සිටියේ චීනය අනෙකුත් රටවල් සමඟ පවත්වන සබඳතා දෙපාර්ශවයටම වාසිදායක අන්දමින් සිදුකරන බවයි.
ශ්‍රී ලංකාව සම්බන්ධයෙන් ද එය ඒ ආකාරයෙන්ම ක්‍රියාත්මක වන බව ඔහු අවධාරණය කළා.
පුළුල් ලෙස සාකච්ඡා කොට, දෙපාර්ශවයේම දායකත්වයෙන්, දෙපාර්ශවයටම ප්‍රතිඵල ලැබෙන අයුරින් ව්‍යපෘති ක්‍රියාත්මක කිරීම චීනයේ ප්‍රතිපත්තිය බවයි ඔහු කියා සිටියේ.
එමෙන්ම, චීන – ශ්‍රී ලංකා සබඳතා සම්බන්ධයෙන් ලක් රජයේ නිලධාරින් සිදුකරන සුබවාදී ප්‍රකාශ පිළිබඳව ද චීන විදේශ අමාත්‍යාංශ ප්‍රකාශකයාගේ ප්‍රසාදය පළ වුණා.
චීනය සහ ශ්‍රී ලංකාව අතර සහයෝගිතාව නිවැරදි මාවතක ගමන් කරන බව ඔහු වැඩිදුරටත් කියා සිටියා.
