ලොව පුරා හින්දු බැතිමතුන් මහත් බැතියෙන් යුක්තව උපවාස ශීලය සමාදන් වන්නා වූ මහා ශිව රාත්‍රි දිනය අදට යෙදී තිබෙනවා.
හින්දු බැතිමතුන් වෙනුවෙන් සුබ පැතුම් එක් කරමින් ජනාධිපති මෛත්‍රීපාල සිරිසේන සඳහන් කළේ සමස්ත ලෝකයටම ශාන්තිය උදාවේවායි යන ප්‍රාර්ථනය සමඟින්.
මානව සංහතිය යහමඟ යවන්නටත්, ආගමික විශ්වාසයන් හා සමාජ යහපැවැත්ම මිනිස් සමාජය තුළ තහවුරු කරන්නටත්, මහා ශිව රාත්‍රිය හේතු වන බවයි ජනාධිපතිවරයා නිකුත් කළ නිවේදනයේ සඳහන් වන්නේ.
මේ අතර, අග්‍රාමාත්‍ය රනිල් වික්‍රමසිංහ ද මහා ශිව රාත්‍රිය වෙනුවෙන් නිවේදනයක් නිකුත් කර තිබෙනවා.
වාර්ගික, ආගමික භේදවලින් තොරව එකිනෙකාගේ සංස්කෘතික, ආගමික, විවිධත්වය අගයමින් දිවි ගෙවීම සඳහා මහා ශිව රාත්‍රී දිනය ජීවිතවලට ආලෝකයේ මාවතක් කර ගන්නා ලෙසයි අග්‍රාමාත්‍යවරයා නිවේදනයක් නිකුත් කරමින් සඳහන් කළේ.
