යහපත් රටක් නිර්මාණය කිරීමට ව්‍යවස්ථාවේ වෙනසක් අවශ්‍ය වුවත්, එහිදී තමා අපේක්ෂා කරන්නේ පාර්ලිමේන්තුව ශක්තිමත් කිරීමේ වෙනසක් මිස අන් අරමුණු ඉටුකර ගැනීමේ වෙනසක් නොවන බව ජනාධිපති මෛත්‍රීපාල සිරිසේන පවසනවා.
හොරණ – ඵෙතිහාසික ඔලබොඩුව ශ්‍රී ජයවර්ධනාරාම රජමහා විහාරස්ථානයේ ඊයේ පැවති පුණ්‍යෝත්සවයකට එක්වෙමින් ජනාධිපතිවරයා මේ බව කියා සිටියා.
අලුත් ව්‍යවස්ථාවක් පිළිබඳව අද ඇතමුන් කථා කළත්, තමා අතට තවමත් එවැන්නක් පත්වී නොමැති බවත්, ඒ පිළිබඳව දැනුවත්වීමක්ද සිදුවී නොමැති බවත් ජනාධිපතිවරයා එහිදී සඳහන් කළා.
එමෙන්ම, ව්‍යවස්ථාවක් පිළිබදව කතා කිරීම එක් පැත්තකින් දකුණේ බෞද්ධ ජනතාව නොසන්සුන් කිරීමක් වන අතර, අනෙක් පැත්තෙන් උතුරේ ජනතාව රැවටීමක් බව ද ජනාධිපතිවරයා කියා සිටියා.
ව්‍යවස්ථා සංශෝධනයක් කරන්නේ නම් එහි ප්‍රමුඛත්වය හිමි විය යුත්තේ ශක්තිමත් පාර්ලිමේන්තුවක් ඇති කිරීමට බව ප්‍රකාශ කළ ජනාධිපතිවරයා ඒ සඳහා තම සහයෝගය හිමි වන බව ද සඳහන් කළා.
හොරණ – ඵෙතිහාසික ඔලබොඩුව ශ්‍රී ජයවර්ධනාරාම රජමහා විහාරස්ථානයේ අභිනවයෙන් ඉදිකරන ලද උපෝසථාගාරය සඟ සතු කොට පූජා කිරීම ඊයේ ජනාධිපතිවරයාගේ ප්‍රධානත්වයෙන් පැවැත්වුණු අතර, ඊට අස්ගිරි පාර්ශවයේ මහනායක අතිපූජ්‍ය වරකාගොඩ ඥානරතන නාහිමියන් ද එක්ව සිටියා.
එමෙන්ම එම පුණ්‍ය උත්සවයට මල්වතු පාර්ශවයේ අනුනායක පූජ්‍ය නියංගොඩ විජිතසිරි හිමියන් ප්‍රමුඛ මහා සංඝරත්නය මෙන්ම අමාත්‍යවරුන් සහ හිටපු ආරක්ෂක ලේකම් ගෝඨාභය රාජපක්ෂ ද එක්ව සිටි බවයි ජනාධිපති මාධ්‍ය අංශය නිවේදනය කළේ.
මේ අතර, මුදල් කොමිෂන් සභාවේ නව ගොඩනැගිල්ල විවෘත කිරීම අද පෙරවරුවේ රාජගිරියේදී සිදුවුණේ ජනාධිපති මෛත්‍රීපාල සිරිසේනගේ ප්‍රධානත්වයෙන්.
