ස්වසන අපහසුතාවකින් මියගිය බ්‍රිතාන්‍ය ජාතික රග්බි ක්‍රීඩකයා සහ අසාධ්‍ය තත්ත්වයෙන් පසුවන අනෙක් රග්බි ක්‍රීඩකයා අධික ලෙස මත්පැන් සහ මත්ද්‍රව්‍ය භාවිත කර ඇති බව මූලික පරීක්ෂණවලදී අනාවරණ වී තිබෙනවා.
මොහු ඇතුලූ 22 කුගෙන් යුත් බ්‍රිතාන්‍යයේ Clems Pirates Rugby රග්බි කණ්ඩායම පසුගිය 10 වනදා මෙරටට පැමිණ තිබුණේ කොළඹ ප්‍රධාන පෙළේ ක්‍රීඩා සමාජයක් විසින් සංවිධාන කළ සුහද රග්බි තරගාවලියක් සඳහා සහභාගිවීමටයි.
පෙරේදා එහි තරගයකට සහභාගිවීමෙන් පසු අදාළ ක්‍රීඩා සමාජ සංකීර්ණයේ පැවති රාත්‍රී භෝජන සංග්‍රහයකටද මොවුන් එක්ව තිබෙනවා.
ඉන් අනතුරුව අදාළ ක්‍රීඩකයින් දෙදෙනා කොල්ලූපිටිය ප්‍රදේශයේ රාත්‍රී සමාජශාලාවකට ගොස් එහිදී අධික ලෙස මත්පැන් පානය කර නැවත ඔවුන් ලැගුම් ගෙන සිටි කොළඹ – කොටුව ප්‍රදේශයේ ලැගුම්හල වෙත පැමිණ තිබෙනවා.
ඊයේ අළුයම මෙම ක්‍රීඩකයින් දෙදෙනාට ස්වසන අපහසුතාවක් හටගෙන ඇති අතර, පසුව හෝටල් කළමනාකාරිත්වය විසින් ක්‍රීඩකයින් දෙදෙනා ඇතුළත් කරනු ලැබුවේ කොළඹ පෞද්ගලික රෝහලකටයි.
එහිදී 26 හැවිරිදි රග්බි ක්‍රීඩකයා මියගොස් ඇති අතර, 27 වන වියේ පසුවන ක්‍රීඩකයාගේ තත්ත්වය අසාධ්‍ය බවයි පොලීසිය සඳහන් කළේ.
කෙසේ වෙතත් මොවුන් භාවිත කර ඇති මත්ද්‍රව්‍ය සම්බන්ධයෙන් තොරතුරු මෙතෙක් අනාවරණ වී නැහැ.
මියගිය ක්‍රීඩකයාගේ පශ්චාත් මරණ පරීක්ෂණය උතුරු අයර්ලන්තයේ සිටින ඔහුගේ් ඥාතීන් මෙරටට පැමිණි පසු සිදුකිරීමට නියමිත බවයි කොටුව පොලීසිය සඳහන් කළේ.
