එක්සත් ජාතීන්ගේ 73 වන මහා මණ්ඩල සමුළුව ඇමතීම සඳහා ජනාධිපති මෛත්‍රීපාල සිරිසේන අද පස්වරුවේ ඇමරිකා එක්සත් ජනපදය බලා පිටත්ව යාමට නියමිතයි.
එක්සත් ජාතීන් සියළුම ජනතාවට සමීප කරවීම හා සාධාරණ සාමකාමී හා තිරසර සමාජයක් සඳහා වූ ගෝලීය නායකත්වයේ සාමූහික වගකීම යන්න මෙවර සැසි වාරයේ තේමාව වනවා.
නිව්යෝක් නුවර පිහිටි එක්සත් ජාතීන්ගේ සංවිධාන මූලස්ථානයේදී සැසි වාරය පැවැත්වෙන අතර එහි ප්‍රධාන සැසි වාරය ලබන අඟහරුවාදා ආරම්භ කෙරෙනවා.
ජනාධිපති මෛත්‍රීපාල සිරිසේන එදින පස්වරුවේ සිය විශේෂ දේශනය ඉදිරිපත් කිරීමට නියමිතයි.
මේ අතර, ලබන සඳදා ජනාධිපතිවරයා ලෝක මත්ද්‍රව්‍ය ගැටළුව පිළිබද ගෝලීය ක්‍රියාමාර්ගයන් සඳහා වූ හමුවට එක්වන අතර අනතුරුව එදිනම නෙල්සන් මැන්ඩෙලා සාම සමුළුවේ සමාරම්භක අවස්ථාවට ද එක් වනු ඇති.
26 වන බදාදා ජනාධිපතිවරයා ක්ෂය රෝගය පිළිබද විශේෂ වැඩසටහනකට ද එක්වීමට නියමිත අතර, ඉන් අනතුරුව එක්සත් ජාතීන්ගේ සංවර්ධන වැඩසටහන ශ්‍රී ලංකාව සම්බන්ධයෙන් නව අරමුදලක් පිහිටුවීමේ ගිවිසුම අත්සන් තැබීමේ අවස්ථාවට ද එක්වනවා.
