ඡන්දය ඉල්ලා නිවසින් නිවසට යමින් සිටි පිරිසක් විසින් දල්වන ලද රතිංඤ්ඤයක් හේතුවෙන් කම්පනයට පත්ව ඇති තරුණියක් ප්‍රතිකාර සදහා පුත්තලම මූලික රෝහලට ඇතුළත් කර තිබෙනවා.
04 වැනිදා රාත්‍රීයේ පුත්තලම – නල්ලන්දළුව ප්‍රදේශයේදී මෙම සිද්ධිය සිදුව ඇති බවයි අප වාර්තාකරු සඳහන් කළේ.
ප්‍රතිකාර සදහා රෝහල් ගත කර ඇත්තේ නල්ලන්දළුව පදිංචිව සිටි රිෆායි රිෆා නමැති 16 හැවිරිදි තරුණියක්.
කල්පිටිය ප්‍රාදේශීය සභාවට එක්සත් ජාතික පක්ෂයෙන් තරග කරන අපේක්ෂකයෙකුගේ ආධාරකරුවන් පිරිසක් 04 වැනිදා ඡන්දය ඉල්ලමින් නල්ලන්දළුව ප්‍රදේශයේ ගෙන් ගෙට යමින් සිට තිබෙනවා.
එම අවස්ථාවේදී ඔවුන් විසින් විශාල ප්‍රමාණයේ රතිංඤ්ඤා දල්වා ඇති බවත්,එසේ දල්වන ලද එක් රතිංඤ්ඤයක් නිවසක් තුළට විසි කර ඇති බවත් පොලීසියට ලැබී ඇති පැමිණිල්ලේ සදහන් වන්නේ.
ප්‍රතිකාර සදහා රෝහල් ගත කර ඇති තරුණියගේ තත්ත්වය බරපතල නොවන බව රෝහල් ආරංචි මාර්ග සඳහන් කරනවා.
සැකකරුවන් මෙතෙක් අත්අඩංගුවට ගෙන නොමැති බවයි අප වාර්තාකරු වැඩි දුරටත් සඳහන් කළේ.
පුත්තලම පොලීසිය වැඩිදුර විමර්ශණ කටයුතු කරගෙන යයි.
