රුපියල් කෝටි 4කට ආසන්න වටිනාකමකින් යුත් හෙරොයින් තොගයක් දක්ෂිණ අධිවේගී මාර්ගයේ කුරුඳුගහ හැතැප්ම අධිවේගී පිවිසුම ආසන්නයේ ගරාජයක් අසළ තිබී ඊයේ රාත්‍රියේ සොයා ගත්තා.
මෙහිදී හමුවූ හෙරොයින් ප්‍රමාණය කිලෝග්‍රෑම් 3කට අධිකයි.
පොලිස් මත්ද්‍රව්‍ය නාශක කාර්යාංශයට ලද බුද්ධි තොරතුරකට අනුව මෙම වැටලීම සිදුකර ඇති බවයි එම කාර්යාංශයේ උසස් නිලධාරියෙකු හිරු ප්‍රවෘත්ති අංශය සිදුකළ විමසීමකදී සඳහන් කළේ.
මෙම මත්කුඩු තොගය සොයා ගැනීමේ සිද්ධිය සම්බන්ධයෙන් පුද්ගලයන් 5 දෙනෙකුගෙන් පමණ ප්‍රශ්න කර ප්‍රකාශ සටහන් කරගෙන ඇති අතර, ඒ ඔස්සේ හෙරොයින් තොගයේ හිමිකරු සම්බන්ධයෙන් තොරතුරු හෙළි වී ඇති බවයි වාර්තා වන්නේ.
කෙසේ වෙතත්, මෙතෙක් සැකකරුවන් කිසිවෙකු අත්අඩංගුවට ගෙන නොමැති බව පොලිස් මාධ්‍ය ප්‍රකාශක කාර්යාලය සඳහන් කළා.
