මුලතිව් විශ්වමඩු,ඉලන්ගෝපුරම් ප්‍රදේශයේ සඟවා තිබු එල්.ටී.ටී.ඊය සංවිධානයට අයත් බවට සැකකරන පුපුරණ ද්‍රව්‍ය තොගයක් ඊයේ (03) පොලිස් විශේෂ කාර්ය බළකා නිළධාරීන් විසින් සොයාගෙන තිබනෙවා.
පොලිසියට ලද තොරතුරක් මත සිදුකළ පරීක්ෂා කිරීමකදීයි පොලිස් විශේෂ කාර්ය බළකා නිළධාරීන් මේ අවි තොගය සොයාගෙන ඇත්තේ.
ඒ මුලතිව් මහේස්ත්‍රාත් අධිකරණයේ ලබාගත් නියෝගයකට අනුවයි.
සොයාගත් පුපුරණ ද්‍රව්‍ය අතර මිලිමීටර 60 වර්ගයේ මෝටාර් උණ්ඩ 736 ක්, එම්.75 වර්ගයේ අත්බෝම්බ 06 ක්, ටි 82 වර්ගයේ අත්බෝම්බ 01 ක්, ආර්.පි.ජි.ගිනි අවි දෙකක්, ටි 56 ගිනි අවි කොටස් කිහිපයක්, ගුවන් යානා නාශක උණ්ඩ 80 ක් අදාළ ස්ථානයේ තිබු බව පොලිසිය පැවසුවා.
පුදුකුඩිඉරිප්පු පොලිස් නිළධාරීන් පැවසූවේ මෑත කාලයේදී මුලතිව් පුදුකුඩිඉරිප්පු ප්‍රදේශයෙන් හමුවූ විශාලතම පුපුරණ ද්‍රව්‍යතොගය මෙය බවයි.
මුලතිව් මහේස්ත්‍රාත් අධිකරණ නියෝග යටතේ අදාළ අවි තොගය පොලිස් විශේෂ කාර්ය බළකා නිළධාරීන් නිශ්ක්‍රීය කිරීමට නියමිත අතර, සිද්ධිය සම්බන්ධයෙන් පුදුකුඩිඉරිප්පු පොලිස් නිළධාරීන් හා පොලිස් විශේෂ කාර්ය බළකා නිළධාරීන් වැඩිදුර පරීක්ෂණ සිදුකරනවා.
(ඡායාරූප – මාධව කුලසුරිය )
