දක්ෂිණ අධිවේගී මාර්ගයේ අතුරුගිරිය පාලම අසළ දී නවතා තිබූ ලොරි රථයක් පරීක්ෂා කිරීමේදී එහි තිබී විදේශීය රටක නිෂ්පාදිත ජීව අත්බෝම්බ දෙකක් සමඟින් සැකකරුවන් දෙදෙනෙකු අත්අඩංගුවට ගෙන තිබෙනවා.
පොලීසිය විසින් අද අලූයම නවතා තිබූ ලොරි රථය පරීක්ෂා කිරීමේදී අදාළ ජීව අත්බෝම්බ සොයාගෙන ඇති බවයි පොලිස් මාධ්‍ය ප්‍රකාශක කාර්යාලය සඳහන් කළේ.
සැකකරුවන් වැලිගම සහ බේරුවල ප්‍රදේශවල පදිංචිකරුවන්.
මේ අතර, මිනුවන්ගොඩ – හීනටිය ප්‍රදේශයේදී පාතාල කල්ලි සාමාජිකයෙකු ගිනි අවිත් සමඟ ඊයේ රාත්‍රියේ අත්අඩංගුවට ගනු ලැබුවා.
පොලීසිය සඳහන් කළේ පිස්තෝලයක්, මැගසින් එකක් සහ මිලිමීටර් 9 වර්ගයේ ජීව උණ්ඩ 3ක් සමඟින් සැකකරු අත්අඩංගුවට ගත් බවයි.
වෙඩි තැබීමකින් මිය ගිය ෆ්‍රෙඞී නැමැති පාතාල කල්ලි නායකයෙකු සතුව මෙම ගිනි අවි සහ උණ්ඩ තිබී ඇති බවටයි පසුව සිදුකරන ලද පොලිස් පරීක්ෂණවලින් අනාවරණ වී ඇත්තේ.
