ඓතිහාසික පිදුරංගල පර්වතය මත සිට අඩනිරුවත් ඡායාරූප ගෙන සමාජ මාධ්‍යවලට මුදා හැරි තරුණයින් අත්අඩංගුවට ගැනීම සදහා පොලීසියේ විශේෂ කණ්ඩායමක් මේ වනවිට ගලේවෙල සහ කුරුණෑගල ප්‍රදේශවල මෙහෙයුම් ආරම්භ කර තිබෙනවා.
පොලීසිය සදහන් කළේ එම ඡායාරූපවල පෙනී සිටින තරුණයින් ගලේවෙල සහ කුරුණෑගල ප්‍රදේශයේ පදිංචිකරුවන් බවට හදුනාගෙන ඇති බවයි.
එමෙන්ම, අදාළ තරුණයින් අත්අඩගුංවට ගැනීම සදහා පොලිසිය සිදු කරන මෙහෙයුම් සඳහා ප්‍රදේශවාසීන් සහ ස්වෙච්ඡා සංවිධාන කිහිපයක් ද සහය දක්වා තිබෙනවා.
අඩනිරුවත් ඡායාරූප සමාජ මාධ්‍ය වෙත මුදා හරිමින් ඔවුන් බලාපොරොත්තු වී ඇත්තේ මුහුණුපොත හරහා තමන්ට ලැබෙන ප්‍රතිචාර වැඩි කර ගැනීමට බවයි වාර්තා වන්නේ.
පර්වත මුදුනේ සිට ලෝක උරුමයක් ලෙස නම් කර ඇති සීගිරිය දෙසට මුහුණලා ගෙන තිබූ අඩ නිරුවත් ඡායාරූප සම්බන්ධයෙන් ඊයේ හිරු ප්‍රවෘත්ති මගින් මුල් වරට අනාවරණය කළා.
පොලිස් මූලස්ථානය ඊයේ නිවේදනය කළේ අසභ්‍ය ප්‍රකාශන වැළැක්වීමේ සංශෝධන පනත හා පොලිස් ආඥා පනත ප්‍රකාරව මෙම ඡායාරූපයන්ට පෙනී සිටි පුද්ගලයින්ට එරෙහිව නීතිමය ක්‍රියාමාර්ග ගැනීමට කටයුතු කරන බවයි.
අඩ නිරුවත් ඡායාරූප ගෙන ෆේස්බුක් සමාජ ජාලයට මුදාහැරි තරුණයින්ගෙන් දෙදෙනෙකුගේ අනන්‍යතාවය දැනටමත් අනාවරණය කරගෙන තිබෙනවා. ඔවුන් අත්අඩංගුවට ගැනීම සදහායි පොලීසිය මේ වනවිට අදාළ ප්‍රදේශවලට ගොස් මෙහෙයුම් ආරම්භ කර ඇත්තේ.
එමෙන්ම, පුරාවිද්‍යා අධ්‍යක්ෂ ජනරාල් මහාචාර්ය පී.බී. මණ්ඩාවල, ද හිරු ප්‍රවෘත්ති අංශයට අදහස් දක්වමින් කියා සිටියේ පුරාවිද්‍යා පනත යටතේ ඉදිරියේදී ඔවුන්ට එරෙහිව නඩු පැවරීමට කටයුතු කරන බවයි.
