“අගමැති පොලිසිය තාවකාලිකව බාරගත්තාම මෙහෙම නම් ස්ථිරව දුන්නොත් කොහොමට හිටියිද?” 
“අගමැතිතුමාට පොලීසිය තාවකාලිකව බාර දීලා ගොවීන්ට මෙහෙම පහර දුන්නානම්, නීතිය හා සාමය ස්ථිරව බාර දුන්නොත් කොහොම ගහයිද” යැයි සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා පවසයි.
ඒ මහතා මේ බව පැවසුවේ අද (01) තඹුත්තේගම නගරයේ උද්ගෝශණයේ යෙදීම හේතුවෙන් අත්අඩංගුවට ගෙන රක්ෂිත බන්ධනාගාර ගතකෙරුණු ගොවීන්ගේ සුව දුක් විමසීමට පැමිණි අවස්ථාවේ දී ය.
එහි දී වැඩිදුරටත් අදහස් දැක් වූ නාමල් කරුණාරත්න මහතා…
“අද අර්ජුන ඇලෝසියස්ලා, උදයංග වීරතුංගලා, රටින් පැනලා ඉන්න මොහොතක් මේක. ඒ කම්බ හොරු අද නිදැල්ලේ ඉන්න මොහොතක හොරු ටයිකෝට් දාගෙන පාර්ලිමේන්තුවේ නිදහසේ ඉන්නවා.
රටේ නම් දරාපු කුඩුකාරයෝ හොරු සියළු දෙනා නිදැල්ලේ ඉන්නකොට, අහිංසක ගොවි, අම්මා තාත්තාගේ අයිතිය වෙනුවෙන් පාරට බැහැපු ගොවි අම්මලා තාත්තලා අද ඉන්නේ හිර බත් කකා.
ජනාධිපති පැහැදිලිවම ප්‍රකාශ කළා ගොවීන්ගේ සටන් සාධාරණයි කියලා. එම සටන් මා කිසිසේත් මර්දනය කරන්නේ නැහැ කියලා. නමුත් ජනාධිපති තුමනි ඊයේ (28) ගොවියන්ට පහරදීලා ගොවියා හිරගෙදරට ගාල් කරලා.
කන්න තුන හතරක් ගොවියට වගා කර ගන්න බැරි වුණා. පොහොර සල්ලි වන්දි මුදල් වෙලාවට දෙන්න බැරිවුණා. ඒ නිසා රත්තරන් බඩු ටික, පදින බයිසිකලේ, වතුර මෝටරය උකස් තියලා ඒවා දැන් සින්න වෙලා තියෙන මොහොතක ගොවිය දැඩි පීඩනයක ඉන්න මොහොතක තමයි ගොවියා මහ පාරට බැස්සේ. නැතුව ඇඟේ අමාරුවට නෙමෙයි. ඒ ගොවියට සැලකුවේ මේ විදිහටයි.
ගොවියා මහ පාරට බැස්සේ රාජපක්ෂ ආණ්ඩුව අටවපු උගුලකට. ඒ අටවපු බෝම්බ තමයි මේ පත්තු වෙන්නේ. උමාඔය, සයිටම් වැනි ඒ අටවපු බෝම්බ පත්තු වුණා. දැන් ප්‍රාදේශීය වශයෙන් අටවපු බෝම්බ තමයි මේ පත්තු වෙන්න පටන් අරන් තියෙන්නෙ.
මේ පානීය ජල යෝජනා ක්‍රමට ක්‍රියාත්මක කරන්න පුළුවන් යෝජනාවක් අපි කරන්නම්. රාජාංගනයේ ජලය යන්නේ නීලබැම්ම ජලාශයට’ නීල බැම්මෙන් මහා දැවැන්ත ජල කඳක් වාර්ෂිකව මහ මුහුදට ගලා යනවා. නීල බැම්මෙන් පහත මේ ජල ව්‍යාපෘතිය ක්‍රියාත්මක කරන්න පුළුවන් නම් ගොවියා ගේ ප්‍රශ්නයට විසඳුම් ලැබෙනවා. පානීය ජල ප්‍රශ්නයක් විසඳෙනවා. එතකොට දෙපැත්ත සමබර වන විධියට මෙම ව්‍යාපෘතිය ක්‍රියාත්මක කරන්න කියලා ආණ්ඩුවට අපි බලකර සිටිනවා.”
මෙම අවස්ථාවට සමස්ත ලංකා ගොවිජන සම්මේලනයේ උප සභාපති සුසන්ත කුමාර නවරත්න මහතාද තවත් ගොවීන් පිරිසක්ද එක්වී සිටිහ.
